Выстава фотаздымкаў «Шпацыр у шэрым. Верш»


Літаратурны музей Максіма Багдановіча прымае ўдзел у міжнародным фестывалі «Месяц фатаграфіі ў Мінску — 2019», які ладзіцца з 10 верасня па 2 кастрычніка 2019 года. У фестывалі задзейнічаны два дзясяткі выставак фатографаў і фотакалектываў з 10 краін на 8 сталічных пляцоўках з аўдыторыяй звыш паўмільёна чалавек. Фестывальныя выстаўкі пройдуць у Галерэі сучаснага мастацтва «Ў», Нацыянальным цэнтры сучасных мастацтваў (НЦСМ), Літаратурным музеі Максіма Багдановіча, у прасторы «Кніжная Шафа», а таксама ў Нацыянальным гістарычным музеі Рэспублікі Беларусь.

На пляцоўцы Літаратурнага музея Максіма Багдановіча будзе прадстаўлена часовая экспазіцыя фотаздымкаў «Шпацыр у шэрым. Верш» беларускай перакладчыцы і паэткі Юлі Цімафеевай.

Мінск і яго паэтычны патэнцыял зрабіліся асноўнай тэмай фотаработ Юлі Цімафеевай. На яе чорна-белых здымках — сцэны гарадскога жыцця, сілуэты людзей, лініі і рытмы дарог, дрэў, правадоў — робяцца радкамі верша – даўжынёй у шпацыр.

Юля Цімафеева — беларуская паэтка, перакладчыца, фатографка, аўтарка двух зборнікаў паэзіі, удзельніца літаратурных фестываляў у Беларусі і за мяжой. Яе вершы перакладзены на некалькі еўрапейскіх моваў.

Яе першая фотавыстава «Сіні: колер вясковага жыцця» (Blau: eine dörfliche Lebensfarbe) прайшла ў Германіі ў Потсдамскім універсітэце. Фотаздымкі Юлі Цімафеевай друкаваліся ў беларускіх і замежных часопісах. Яе работы вылучаюцца эмацыйнай трапнасцю і выкшталцонай выразнасцю.

Прэзентацыя фотавыставы «Шпацыр у шэрым. Верш» адбудзецца 25 верасня 2019 года ў 18.30.

Літаратурны музей Максіма Багдановіча

г.Мінск, вул. М.Багдановіча, 7а

тэл.: (017) 334 07 61, (017) 334 42 69

maksimbagdanovich@gmail.com