18 мая ў Музеі беларускага кнігадрукавання прайшлі мерапрыемствы з нагоды Міжнароднага дня музеяў.
Супрацоўнікі Музея арганізавалі невялічкае свята для сваіх маленькіх наведвальнікаў і іх бацькоў, прысвечанае чароўнай кнізе Алены Туравай “Рыжык ў Залюстрэччы” і аднайменнаму фільму. Невыпадкова для свята была абраная менавіта гэта кніга, бо здымкі фільма па ёй праходзілі ў Музеі-бібліятэцы Сімяона Полацкага. Падчас мерапрыемства дзеці даведаліся, як Музей ператварыўся ў здымачную пляцоўку, узгадалі іншыя казкі, па якіх былі знятыя фільмы, самі адчулі сябе маленькімі акцёрамі, падняўшыся на славуты другі паверх Музея-бібліятэкі. Завяршылася свята дэманстрацыяй фільма “Рыжык у Залюстрэччы”.
У кожнага жадаючага была магчымасць наведаць новую выставу “Таямніцы на кніжнай паліцы”, дзе прадстаўлены кнігі славутых беларускіх пісьменнікаў, створаныя імі спецыяльна для дзяцей. (Выстава працягне працу да 25 чэрвеня).
Акрамя таго, у Музеі на працягу ўсяго дня ўдзельнікі дабрачыннай акцыі “10 год разам. Час тварыць дабро” ўпрыгожвалі кветкамі сімвалічнае “Дрэва жыцця”.
Дзякуй за тое, што Вы правялі гэты дзень з намі.
