Выстава мастака Алега Стасевіча з Барысава «Роднай прыроды мілыя рысы” адкрылася ў Дзятлаўскім краязнаўчым музеі.
Яго натхненне – беларускі пейзаж. Мастак Алег Стасевіч стварыў цыкл карцін, прысвечаных родным краявідам. Лясы і рэкі, маленькія вёскі, стагі сена і коні на лузе – ад усіх палотнаў вее беларускім спакоем і цеплынёй. Кожная праца – своеасаблівае прызнанне аўтара ў любові да роднай прыроды.
Мастак - пейзажыст не мае акадэмічнай адукацыі. Любоў да колеру і фарбаў ён пераняў ў першага настаўніка яшчэ ў гады вучобы ў школьнай студыі выяўленчага мастацтва. Аднак толькі праз дзесяцігоддзі Стасевіч перайшоў ад сузірання да дзеяння і ўзяўся за пэндзаль. Натхнёны творчасцю любімага Шышкіна пачаў ствараць уласную жывапісную гісторыю.
Свае шматслойныя краявіды мастак малюе ў пастознай, корпуснай тэхніцы. Шчыльныя мазкі фарбы ствараюць рэльефнасць, праз якую можна нібы зазірнуць у глыб карціны, адчуць шолах лістоты, шум лесу – любімы прадмет малюнка мастака.
Часам ён працуе з фотаздымкаў – інтуітыўна да прыродных рэльефаў, якія трапляюць у аб'ектыў, дадае ўласнае бачанне і фантазіі. Натхненне шукае вакол сябе, побач з уласным домам, у лесе, на лузе.
Закаханасць мастака ў родны край дазваляе яму ствараць праўдзівыя сюжэты, якія сёння знаходзяцца ў прыватных калекцыях і галерэях Нямеччыны, Італіі, Кітая, Аўстрыі, Англіі. Ацаніць творчасць пейзажыста змогуць і дзятлаўчане.
Выстава будзе працаваць з 5 красавіка па 10 мая 2022 года.
Падрыхтавала Абрамчык Алена, старшы навуковы супрацоўнік музея
